Илјадници заразени, аларм во провинцијата Гуандонг

Над 7.000 лица во кинеската провинција Гуандонг се заразени со вирусот чикунгуња од јули наваму. Најмногу случаи се пријавени во градот Фошан, каде што пациентите се задржуваат во болница најмалку седум дена или до добивање негативен тест. Секоја болничка постела е заштитена со специјални мрежи против комарци.

Што е чикунгуња?

Станува збор за вирусна инфекција што се пренесува исклучиво преку убод од заразен комарец. Симптомите вклучуваат висока температура, осип и интензивни болки во зглобовите – некои пациенти ги чувствуваат овие болки со месеци, па дури и години.

Иако вирусот е вообичаен во делови од Азија и Африка, во Кина ретко се регистрираат огништа. Симптомите се појавуваат три до седум дена по убодот, а според здравствените власти, заразата веќе се проширила во најмалку 12 града. Потврден е и првиот случај во Хонг Конг – кај 12-годишно дете кое се вратило од Фошан.

Кина ги враќа построгите мерки

Властите веднаш реагираа со низа ограничувања слични на оние од пандемијата на Ковид-19. Повторно се промовираат брзи тестирања кај лица со температура, осип или болки. Има глоби до 10.000 јуани за домаќинства со застоена вода – главен извор за размножување на комарците.

Како дел од мерките, се користат дронови за лоцирање на комарски легла, се пуштаат риби што јадат ларви и се внесуваат т.н. „слонови комарци“ – природни предатори на заразените инсекти.

Загриженост кај граѓаните и социјалните мрежи

Иако досегашните случаи се лесни, а 95% од пациентите закрепнуваат за една недела, во јавноста расте загриженоста. Многумина на социјалните мрежи се прашуваат дали мерките се неопходни, потсетени на строгите рестрикции од Ковид-периодот.

Чикунгуња за првпат е идентификувана во Танзанија во 1952 година, а денес е присутна во над 110 држави. Светската здравствена организација предупредува дека најдобрата заштита останува елиминирањето на сите можни легла за комарци.