Остра реакција на социјалните мрежи

Познатиот македонски фолк пејач Спасен Силјаноски остро реагираше за програмата на годинашниот Тиквешки Гроздобер, обвинувајќи дека манифестацијата ја губи својата македонска душа и традиција.

Прашања до Јанчев

Со низа прашања што предизвикаа бурни реакции кај јавноста, Силјаноски директно го прозва градоначалникот на Кавадарци, Митко Јанчев:

• „Во која држава се наоѓа Кавадарци?“

• „Во која држава е градоначалник Јанчев?“

• „Во која држава зрее грозјето?“

• „Во која држава ќе се потрошат стотици илјади евра за музичките изведувачи?“

„Гроздобер без македонска песна?“

Силјаноски потсети дека Гроздоберот е симбол на Тиквешкиот регион, на македонската традиција и на автентичната песна, но годинава, според него, програмата повеќе личи на српска „роштиљијада“.

 „Замислете, каков е тоа Гроздобер без ниту една тиквешка песна, без македонски фолк изведувачи како Ангел Џамбазот, Димо Дулот и останатите… Мислев дека нема подолу од дното, ама еве имало.“

Алтернатива за вистинските љубители

Пејачот иронично додаде дека можеби е во заблуда бидејќи сите молчат, но упати порака до вистинските љубители на македонската песна:

„Среќен сум што знам дека оние прави Македонци од Кавадарци ќе се соберат кај Буки и ќе уживаат во песната на Ангел Стојанов-Џамбазот и Димо Дулот.“

Српски ѕвезди – македонска тишина

И годинава на сцената на Гроздобер ќе настапат Марија Шерифовиќ, Цеца, Лепа Брена, Харис Џиновиќ, Јелена Карлеуша, Саша Ковачевиќ и Халид Бешлиќ, додека македонските изведувачи повторно се игнорирани.

Силјаноски праша зошто на најголемата тиквешка манифестација не настапуваат имиња како Марјан Коцев, Елена Велевска, Блага Петреска, Наум Петрески, Миле Кузмановски, Ѓоко Јовиќ и многу други што редовно пеат на други македонски фестивали.