Манасиевски: Фрчкоски добил 200 илјади евра преку „Еразмус+“

ВМРО-ДПМНЕ денеска излезе со сериозни обвинувања за злоупотреба на европски пари во рамки на програмата „Еразмус+“.
На прес-конференција, членот на Централниот комитет Валентин Манасиевски тврдеше дека Љубомир Фрчкоски добил грант од 200 илјади евра во рамки на програмата „стратешко партнерство“, само два месеци по назначувањето за ректор.

„Половина од проектот Фрчкоски го раководел додека бил амбасадор во Обединетите Нации – што е скандалозно и невидено,“ изјави Манасиевски.

Обвинувања за партиски кадри и проекти

Според ВМРО-ДПМНЕ, грантот бил прв во историјата на факултетот, а случајот е „школски пример“ за тоа како СДСМ ја водела државата. Манасиевски постави прашања дали Агенцијата вршела надзор и зошто проектот не бил прекинат кога Фрчкоски станал амбасадор.

„Ова е класичен пример на корупција и партиски интерес пред државниот,“ рече тој.

СДСМ враќа со контраобвинувања

Од СДСМ веднаш реагираа со спротивни тврдења – дека злоупотребите од милиони евра во рамки на „Еразмус+“ водат директно до владејачката ВМРО-ДПМНЕ.

„Наместо одговорност, ВМРО-ДПМНЕ се обидува да ја заташка вистината. Итно бараме целосна истрага за сите инволвирани и за тоа во чии џебови завршиле европските пари,“ порачаа од партијата.

„Еразмус+“ од образовна програма во центар на политички пресметки

Програмата „Еразмус+“, чија цел е да поддржи младински и образовни проекти, последниве години стана еден од најголемите извори на меѓусебни обвинувања помеѓу двете најголеми партии.
Додека ВМРО-ДПМНЕ тврди дека СДСМ ги користела европските фондови за наградување на свои кадри, СДСМ возвраќа дека актуелната власт е таа што се обидува да ги прикрие злоупотребите вредни милиони евра.