Македонија официјално влегува во финишот на подготовките за локалните избори што ќе се одржат на 19 октомври, со втор круг закажан за 2 ноември каде што ќе биде потребно. Собранието има рок до сабота да ги распише изборите, по што следува активирање на целокупниот изборен механизам.

Ова ќе биде најмасовниот изборен процес во земјата, со оглед на тоа што граѓаните ќе избираат градоначалници и советници во 80 општини и во Градот Скопје. Процесот ќе вклучи над 35.000 луѓе во изборната администрација, со нов состав на избирачки одбори поради истечен мандат.

Без гласови од дијаспората

За разлика од претходните избори, дијаспората нема да гласа. Единствен начин македонските државјани во странство да го искористат своето право е да се вратат во татковината и да гласаат лично.

Стартува изборната машинерија

Државната изборна комисија (ДИК) ќе организира јавна седница веднаш по распишувањето на изборите, на која ќе биде презентиран целиот изборен календар. До крајот на август, ќе се одберат по случаен избор 21.000 административци кои ќе бидат дел од избирачките одбори на над 3.500 гласачки места.

Партиите кои освоија најмногу гласови на последните избори – ВМРО-ДПМНЕ, СДСМ, ДУИ и Вреди – ќе предложат уште 14.000 членови за овие одбори. Во септември ќе се одржат обуки и ќе се поделат прирачници за работа.

Контрола на избирачкиот список

Од 15 дена по распишувањето на изборите почнува увидот во избирачкиот список, кој ќе трае 20 дена. Граѓаните ќе имаат можност да ги проверат своите податоци и да поднесат евентуални корекции – онлајн или во подрачните канцеларии на ДИК.

Речиси 10 милиони евра за целата операција

Вкупниот буџет за спроведување на изборите изнесува 9,76 милиони евра. Најголем дел од овие средства – околу две третини – се наменети за платено политичко рекламирање во медиумите. Друг дел ќе се користи за надоместоци за избирачките одбори, логистика, транспорт и печатење на гласачкиот материјал. ДИК најавува дека ќе се преземат мерки за рационализирање на трошоците.

Собранието има уште неколку дена за да го притисне копчето за старт, по што следува трка со времето за подготвување на сеопфатниот изборен процес што ќе ја одбележи политичката есен во Македонија.