Куманово / Скопје – Иако официјалната потврда сè уште се чека, лидерот на движењето ЗНАМ и актуелен градоначалник на Куманово, Максим Димитриевски, вечерва во гостување на ТВ Сител потврди дека разговорите со ВМРО-ДПМНЕ се во напредна фаза и веќе е „извесно“ дека ќе добијат поддршка уште во првиот изборен круг – и во Куманово, и во скопската општина Центар.

Според него, иако формално постапката за негова повторна кандидатура во Куманово не е завршена, одлуката е речиси дефинирана. За Центар, пак, се тестираат неколку имиња преку анкети, а едно од нив е актуелниот заменик-министер за енергетика, Мирослав Лабудовиќ.

„Мерењата ќе покажат кој е најпосакуван за граѓаните. Господинот Лабудовиќ е едно од имињата во оптек, а поддршката од нашите партнери – ВМРО-ДПМНЕ – очекуваме да биде реципрочна, и во Центар, и на ниво на Град Скопје, како и во општини каде што ЗНАМ нема да има свои кандидати“, изјави Димитриевски.

На прашање дали очекува поддршка од албанската коалиција ВРЕДИ во Куманово, тој одговори дека досега немало директни разговори, но постои простор за тоа. Во моментов, фокусот останува на договорот со ВМРО-ДПМНЕ, за кој вели дека е „веќе дефиниран“.

И премиерот Христијан Мицкоски денеска потврди дека преговорите со ЗНАМ се активни и дека веќе се разговара за заеднички кандидати, особено за клучните урбани центри. Според него, повеќе детали ќе бидат објавени кон втората половина на август.

Димитриевски најави и дека коалицијата ЗНАМ ќе има свои кандидати дури и во општини каде што владеат градоначалници од опозицијата, што укажува на сериозна амбиција за поширока територијална покриеност и потенцијални нови сојузи на локално ниво.