По повод 24 години од потпишувањето на Охридскиот рамковен договор – документот кој во 2001 година стави крај на вооружениот конфликт и отвори пат за поголема рамноправност на Албанците во Македонија – коалицијата Вреди обвини дека неговата суштина била злоупотребена од страна на Демократската унија за интеграција (ДУИ) во текот на нивните 22 години владеење.

Во соопштението, Вреди тврди дека ДУИ, наместо договорот да го претвори во реални промени, го користела како „изборен банер“ и „банкомат“ за лично и партиско богатење. Посочуваат конкретен пример од 2013 година, кога Секретаријатот за спроведување на Охридскиот договор распишал тендер во вредност од 6 милиони денари за изработка на анализа за имплементацијата на договорот.

Победник на тендерот, според Вреди, била фирмата „ТАГ Комуникации“, сопственост на лице блиско до ДУИ и на позиција во државните институции под контрола на партијата. Вреди обвинува дека наместо овие анализи да се претворат во конкретни мерки, парите биле потрошени за конференции, трибини и пиар активности, кои само ја одржувале илузијата за напредок.

Во тие анализи, според коалицијата, имало препораки што никогаш не биле спроведени, како:

• донесување законски обврски за правична застапеност на Албанците во државните компании,

• инклузија на борбата против говорот на омраза во Кривичниот законик,

• вистинска децентрализација со обезбеден буџет,

• решавање на статусот на жртвите од конфликтот во 2001 година.

„Ништо од ова не стана реалност, затоа што за ДУИ Охридскиот договор беше само алатка за тендери и за прикривање на неуспесите зад измислени анализи,“ порача Вреди, додавајќи дека партијата секогаш го активирала договорот како политичка алатка кога требало да одвлече внимание од сопствените слабости.

Вреди потенцира дека нивната цел е целосно и вистински да го спроведат Охридскиот договор во пракса, а не само декларативно. Како доказ за таа намера, коалицијата го истакна „историското“ усвојување на Законот за правична и соодветна застапеност, што го опишаа како „епохална политичка победа и правна гаранција“ дека гласот на Албанците никогаш повеќе нема да биде игнориран.