Скопје, 27 јули – Претседателот на Главниот штаб за управување со кризи и директор на Дирекцијата за заштита и спасување, Стојанче Ангелов, денеска предупреди на сериозноста на ситуацијата со шумските пожари кои го зафатија поголемиот дел од територијата на Македонија. На прес-конференција, тој истакна дека дел од пожарите очигледно се резултат на човечка небрежност, но за значителен број случаи постојат индиции, а во некои дури и докази, дека станува збор за намерно подметнати пожари.

„Дел од подметнувањата се случуваат во области каде што нема економска логика – тоа се терени со деградирана или неквалитетна шума. Таму нема дрвна маса со вредност, ниту пак пасишта или туристички интерес. Зошто некој би палел на такви места? Мотивите се сè уште нејасни,“ рече Ангелов.

Сомнежи за економски интерес и пироманија
Првиот човек на ДЗС наведе неколку можни објаснувања за подметнатите пожари. Едно од нив е економски интерес за добивање дозвола за сечење на изгорена шума, особено во случаите каде пожарите се појавуваат во вредни шумски комплекси.

„Имаме пример кај Македонска Каменица, каде висококвалитетна шума беше зафатена од пожар на начин кој не можеме логично да го објасниме,“ рече тој.

Дополнително, тој не исклучи и патолошки мотиви. „Постои можност дека некои од подметнувачите се луѓе со психолошки нарушувања – пиромани, кои чувствуваат возбудување гледајќи како нешто гори. Тие, за да избегнат откривање, најчесто дејствуваат во оддалечени подрачја, каде нема луѓе и камери.“

Дневна статистика: Намалување на бројот, но заканата останува
Според официјалните податоци, вчера се регистрирани рекордни 51 пожар на отворено, додека денеска таа бројка е намалена на 15 пожари, од кои 9 се активни, а 6 ставени под контрола. Како најсериозен пожар е издвоен оној на планината Готен, каде теренот е непристапен, а условите тешки.

Меѓународна помош на повидок
Ангелов потврди дека Македонија добила понуда за помош преку механизмот за цивилна заштита на Европската унија, од Словенија и Франција. Се разгледува испраќање на специјализирани тимови од околу 60 пожарникари, со соодветна опрема и возила.

„Во моментов анализираме дали и кога ќе ја активираме оваа помош. Температурите се нешто пониски, но условите за појава и ширење на пожари сè уште се присутни – сув терен, ветер и недисциплина кај дел од населението,“ нагласи Ангелов.

Апел за внимателност и пријавување на сомнително однесување
Ангелов повторно упати апел до граѓаните да бидат внимателни со отворен оган, да не палат стрништа и отпад, и да пријавуваат секое сомнително или ризично однесување.

„Ниту една држава, без оглед на ресурси и техника, не може сама да се справи со вакви предизвици ако нема дисциплина и одговорност кај граѓаните,“ порача тој.