По тричасовната средба во Алјаска со Владимир Путин, американскиот претседател Доналд Трамп изјави дека украинскиот лидер Володимир Зеленски мора да „склучи договор“ со Москва доколку сака да има вистинска шанса за мир. Во интервју за „Фокс њуз“, Трамп ја нарече средбата „многу топла“ и откри дека страните биле „прилично блиску“ до потенцијално решение за конфликтот.

Трамп порача дека Зеленски треба да покаже иницијатива и дека Европа мора да се вклучи посилно во процесот. Тој дури изрази подготвеност да посредува на директни разговори меѓу Путин и Зеленски, додавајќи: „Не дека сакам да бидам таму, но сакам да бидам сигурен дека ќе се заврши“.

Иако не беше постигнат договор, и Путин и Трамп средбата ја оценија како продуктивна. Путин не ја исклучи можноста за директни преговори со Зеленски, но нагласи дека мора прво да има значителен напредок. Москва, сепак, остана цврста во своите барања: Украина да прифати блоковска неутралност, демилитаризација и денацификација, како и признавање на „новата територијална реалност“ – вклучувајќи ги Крим, Донецк, Луганск, Херсон и Запорожје како дел од Русија.

Дополнително, Кремљ изрази сомнеж во легитимитетот на Зеленски да потпишува какви било обврзувачки договори, бидејќи неговиот претседателски мандат истече минатата година, а тој одби да распише нови избори поради вонредната состојба.