Жена која се претставила како В.А. (56) од селото Војшанци, општина Неготино, по која полицијата трага од 28 јули, се обратила до редакцијата на „Вики Медиа“ со објаснување дека е жива, здрава и дека никогаш не била киднапирана, туку сама го напуштила својот дом поради долгогодишно семејно насилство.

„Јас сум жива и здрава, не сум исчезната, туку се премажив“, изјавила таа, нагласувајќи дека пред заминувањето му оставила писмо на сопругот со точна информација каде ќе оди. Според неа, не е јасно зошто сопругот ја пријавил како исчезната во полицијата.

В.А. објаснила дека причината за заминувањето е континуирано семејно насилство – навреди и притисоци кои, како што вели, повеќе не можела да ги издржи. „Никој од убаво не бега… Се преселив во Неготино, нема зошто да се кријам, сакам и медиумите и институциите да знаат дека сум добро,“ додала таа.

Новинарите ѝ укажале дека е потребно и формално да го извести Одделот за внатрешни работи (ОВР) во Неготино, бидејќи официјално сè уште е заведена како исчезната и се спроведуваат мерки за нејзино пронаоѓање. В.А. одговорила дека ќе се јави во полициската станица и ќе даде изјава.

Од СВР Велес потврдиле дека на 28 јули околу 03:00 часот, сопругот на В.А. пријавил нејзино исчезнување. Веднаш биле преземени мерки за нејзино пронаоѓање, а десетина дена подоцна, во одговор до „Вики Медиа“, од полицијата рекле дека потрагата е сè уште во тек и дека нови информации ќе бидат соопштени штом ги добијат.