Во пресрет на планираната средба со Доналд Трамп во петок, рускиот претседател Владимир Путин телефонски разговарал со севернокорејскиот лидер Ким Џонг Ун, потврдувајќи го нивното „пријателство, добрососедство и стратешка соработка“, соопшти Кремљ.

Путин го информирал Ким за подготовките за разговорите со Трамп, при што главна тема ќе биде војната во Украина. Ким, пак, ветил дека „Северна Кореја целосно ќе ги поддржи сите мерки на руското раководство во иднина“, нагласувајќи ја својата решеност за продлабочување на партнерството.

Како дел од таа поддршка, Ким испратил повеќе од 10.000 севернокорејски војници во Русија за да учествуваат во операциите против украинските сили во пограничниот регион Курск. Северна Кореја испорачала и проектили, гранати и работници, а договорот за сеопфатно партнерство меѓу двете земји предвидува и меѓусебна воена помош во случај на напад врз која било од нив.

Агресијата врз Украина ја изолираше Русија од Западот, но истовремено ја зближи со Пјонгјанг. Јужнокорејските разузнавачи предупредуваат дека Москва сѐ повеќе се потпира на севернокорејски работници и воени ресурси за да ја одржи воената машинерија во функција.