Трансферот на Бенјамин Шешко е на прагот на разрешување. Манчестер јунајтед и Њукасл доставиле официјални понуди за словенечкиот напаѓач, но самиот фудбалер веќе ја избрал својата дестинација – сака да ја продолжи кариерата на „Олд Трафорд“.

Шешко веќе ги договорил личните услови со „црвените ѓаволи“ и се согласил на договор до 2030 година. Сега одлуката е во рацете на РБ Лајпциг, клубот кој има последниот збор во однос на трансферот.

Иако понудата од Њукасл е финансиски поповолна – дури пет милиони евра повисока од онаа на Манчестер јунајтед – Лајпциг сè уште размислува како да постапи. Има две можни сценарија: или Манчестер ќе ја подобри понудата, или клубот ќе го продаде напаѓачот таму каде што ќе добие повеќе пари.

Сепак, со оглед на тоа дека самиот играч сака трансфер во Манчестер, поголеми се шансите клубовите да постигнат договор и да се реализира трансферот што го посакува Шешко.