Во просториите на „Куќата на фудбалот“ беше официјално претставен ВАР системот, кој ќе се користи за првпат во Првата македонска фудбалска лига (Прва МФЛ) од новата сезона. Овој чекор претставува значајно подобрување на технолошката инфраструктура во македонскиот фудбал.

Три ВАР соби и целосна опрема по стандарди на ФИФА

Во рамки на проектот се изградени три ВАР соби, контролна просторија и серверски капацитети кои се во согласност со барањата на ФИФА. Претседателот на Фудбалската федерација на Македонија (ФФМ), Масар Омерагиќ, заедно со Дејан Јакимовски – лидер на ВАР проектот, и Јосип Бартон – претседател на комисијата за делегирање на судии, ги презентираа деталите околу системот.

Дополнително, ФФМ набави и специјално репортажно возило, кое ќе може да се користи и за телевизиски преноси на натпревари.

Омерагиќ: „Горд сум на тимот – ФИФА и УЕФА ни оддадоа признание“

Масар Омерагиќ изрази големо задоволство што проектот е завршен во рекордно време, како што претходно и ветил.

„ВАР системот во Македонија конечно стана реалност. Горд сум на тимот во федерацијата кои 24/7 работеше на овој проект. Ја набавивме целосната потребна технологија, имаме три модерни соби и контролна просторија. За овие три месеци направивме огромна работа. На многу поголеми федерации од нашата им беше потребен многу подолг период за да го спроведат ВАР системот. Затоа ФИФА и УЕФА ни оддадоа признание, не им се веруваше дека за толку кратко време ќе успееме да го реализираме овој голем проект“, изјави тој.

Сите клубови подготвени, освен стадионот во Чаир

Според информациите од ФФМ, сите клубови од Првата лига пријавиле стадиони кои ги исполнуваат условите за користење на ВАР. Единствен исклучок е стадионот во Чаир, каде игра ФК Шкупи, кој сè уште не располага со технички услови за имплементација на системот.

Сите арбитри кои ќе работат во ВАР собите ќе бидат македонски судии, со што се потврдува и локалната експертиза во спроведувањето на новата технологија.