Хамас објави дека е подготвен да дозволи на Црвениот крст да испорача храна и лекови до израелските заложници во Појасот Газа, но само под свои услови. Според нивното воено крило, Ал-Касам бригадите, тоа ќе се случи доколку Израел обезбеди континуирана хуманитарна помош за палестинските цивили и престане со воздушните напади и извидувачки мисии за време на дистрибуцијата.

Израелскиот премиер Бенјамин Нетанјаху побарал директна акција од Црвениот крст, барајќи итна достава на помош до заложниците. Израел тврди дека во Газа се наоѓаат 50 заложници, но само 20 се верува дека се уште се живи. Досега, Хамас не дозволуваше хуманитарен пристап до нив.

Дополнителна вознемиреност предизвикаа објавените видеа од страна на Хамас, во кои се гледаат изнемоштени заложници – едниот копа сопствен гроб, додека другиот гледа снимки за гладта во Газа. Овие пропагандни снимки предизвикаа жестоки реакции во Израел и ширум светот.

Форумот на семејствата на заложниците остро реагира, наведувајќи дека луѓето се држат во нечовечки услови веќе 660 дена, и бараат итна хуманитарна интервенција и целосно ослободување.