Белградското Вишо јавно обвинителство подигна обвинение против шест лица, осомничени дека подготвувале насилно преземање на власта во Србија. Меѓу нив се и познати опозициски активисти, воени ветерани и поранешниот лидер на Воениот синдикат на Србија.

Според обвинителството, групата се сретнала на 21 јуни во Кралево, каде наводно планирала протест во Белград за 28 јуни, разговарајќи за логистика, број на учесници и акции на терен. Во стенограм објавен од обвинителството, еден од осомничените вели: „влегуваш, ја окупираш зградата на владата и не излегуваш“.

Покрај ова, двајца од обвинетите се теретат и за нелегално поседување оружје и муниција. Еден од нив бил фатен со пиштол без сериски број и 32 куршуми, додека кај друг биле пронајдени пушка и 135 парчиња муниција без дозвола.

Обвинителството бара продолжување на притворот за тројца од нив, додека двајца добиле куќен притвор, со цел – како што велат – да се спречи повторување на делото.

Одбраната, пак, тврди дека станува збор за политички мотивиран прогон. Адвокатот Иван Ниниќ ги нарече обвиненијата „режисирана кампања“ насочена против опозицијата, особено во контекст на тековните масовни протести низ Србија.