Израелскиот премиер Бенјамин Нетанјаху жестоко реагираше на најавата на британскиот премиер Кир Стармер за можноста Велика Британија да ја признае палестинската држава, оценувајќи дека тоа би значело поддршка за „монструозниот тероризам на Хамас“.

„Џихадистичка држава денес на границата со Израел – утре закана за Британија. Помирувањето со терористите никогаш не успева,“ напиша Нетанјаху на мрежата Икс (поранешен Твитер), пренесува „Тајмс оф Израел“.

Израелското Министерство за надворешни работи исто така ја осуди позицијата на британскиот премиер, обвинувајќи ја новата влада во Лондон за попуштање пред домашен политички притисок и следење на примерот на Франција.

Во официјалното соопштение од Тел Авив се наведува дека ставот на Британија го поткопува процесот за прекин на огнот во Газа и ги компромитира напорите за ослободување на заложниците. Израел ја повика Лондонската влада да се придржува до досегашната политика и да не презема чекори што би можеле да се толкуваат како легитимирање на Хамас.