Русија и понатаму е дестабилизирачка сила и долгорочна закана за безбедноста на Европа, а политиките на Владимир Путин јасно покажуваат дека тој не е заинтересиран за мир. Ова го изјави заменичката генерална секретарка на НАТО и поранешна министерка за одбрана на Северна Македонија, Радмила Шекеринска, на јавно предавање во Централниот воен клуб во Софија, организирано од Атлантскиот клуб на Бугарија и Здружението на атлантски резервни офицери, пренесува БГНЕС.

Настанот го отвори почесниот претседател на Атлантскиот клуб, Соломон Паси, кој ѝ го честиташе националниот празник на Северна Македонија подарувајќи ѝ букет. Тој истакна дека само четири години по членството во НАТО, Македонија успеала да испрати заменик-генерален секретар на алијансата – и тоа првата жена од Европа.

„Со оглед на стратешката локација на Бугарија на Црното Море, не ви треба јас да ви кажам дека Русија останува најдиректна и најдолгорочна закана. Гледаме дека продолжува да напаѓа домови, училишта и болници во Украина. Само пред два дена Путин започна најмасовен напад врз цивилната инфраструктура со над 800 беспилотни летала, што е доказ дека не сака мир,“ истакна Шекеринска.

Таа потсети и на учеството на бугарските војници во мировните мисии на НАТО во Косово и Ирак, како и на иницијативата за чистење мини во Црното Море.

Во својот говор, Шекеринска се осврна и на американската политика: „Претседателот Доналд Трамп работи да стави крај на оваа ужасна војна, бидејќи никој не заслужува мир повеќе од Украина. Средбата во Белата куќа меѓу Трамп, Зеленски и европските лидери беше силна демонстрација на единство.“

Таа потврди дека НАТО ќе ѝ обезбеди на Украина сè што е потребно за одбрана и одвраќање на идната руска агресија.

Посебно ја пофали Бугарија за одлуката да почне да троши 5% од својот БДП за одбрана: „Ова е огромен напор и од владата и од општеството. Без разлика како ќе заврши војната, Русија ќе остане дестабилизирачка сила, затоа мора да инвестираме повеќе во нашата безбедност,“ порача Шекеринска.

На крај, таа нагласи дека декларациите не се доволни – потребни се инвестиции во воената индустрија, модернизација на армиите и заеднички одговор на НАТО.