Ребрендирање без вистинска промена

ДУИ, преку Европскиот фронт, објави дека влегува во нов политички настап со ново име – Национална алијанса за интеграција, како и со ново лого. Но, јавноста веста ја прими без поголемо внимание, бидејќи сите ја гледаат како козметичка промена пред избори, а не како вистинско ново лидерство.

23 години на врвот

Али Ахмети е на чело на ДУИ цели 23 години, а со улогата во ОНА, неговото влијание трае речиси две и пол децении. Под негово водство Албанците добија историски придобивки: повеќе учество во институциите, официјален статус на албанскиот јазик, претседател на парламент од албанската заедница и засилена видливост на меѓународен план.

Централизирана партија и сенки на корупција

Но долгото владеење ја претвори ДУИ во централизирана партија со силен лидерски култ. Зад Ахмети остануваат бројни афери поврзани со неговите најблиски луѓе – од Муса Џафери и случајот „Телеком“, до Рамиз Мерко кој заврши на американската црна листа. Под нивна контрола беа и клучни претпријатија како М-НАВ и Македонска пошта.

Недопрен од афери, но со истото лице

Иако соработниците му се споменуваат во корупциски скандали, самиот Ахмети останува „чист“ во очите на поддржувачите. Сепак, критиките дека партијата нема ново лице се посилни од кога било. На прашањето на поддржувач: „Кој ќе ве наследи, Села или Таравари?“, Ахмети не одговори – оставајќи отворена дилема.

Време за промена?

Политичкото „пензонирање“ на Али Ахмети сè уште е табу тема во ДУИ, но избирачите веќе размислуваат за тоа. Историјата покажува – секое време има свои херои. Прашањето е дали есенските избори ќе покажат дека времето на Ахмети завршува.