Фудбалскиот клуб Партизан е на чекор до пласман во третото коло од квалификациите за Конференциската лига, откако на првиот меч на неутрален терен во Полска го совлада украинскиот тим Олександрија со 0:2. Победата донесе голем оптимизам меѓу црно-белите, но и подгреана тензија поради односот меѓу двата тима.

Натпреварот во Полска беше обележан со навреди кон српските фудбалери, што создаде негативен однос кон украинскиот клуб во белградската јавност. УЕФА одлучи да не дозволи присуство на гостински навивачи за реваншот во Белград, па на стадионот во Хумска ќе пристигнат само околу 40 претставници од украинската страна – фудбалери, стручниот штаб и делегацијата.

Како одговор на тоа, Партизан реши да ја отвори северната трибина, позната по најстрастните навивачи – Гробарите. Се очекува атмосферата да биде пеколна, а трибините да бидат исполнети со околу 30.000 фанови.

Продажбата на билети оди одлично, а еуфоријата кај навивачите е очигледна – тимот ја започна сезоната убедливо и со позитивна енергија.

Сепак, УЕФА повторно ги стави Гробарите под лупа. Европската фудбалска федерација веќе ги казни црно-белите со над 25.000 евра за инциденти на натпреварот против АЕК Ларнака – пиротехнички средства, блокирани влезови и фрлање предмети на теренот. Сега е издадено јасно предупредување: нови прекршоци против Олександрија ќе значат казна со празни трибини на следниот меч.

Дополнителна причина за затегнатите односи е одлуката на Партизан летово да одигра пријателски натпревар во Русија, што украинската страна го нарече „непријателски гест“.

Слични тензии се забележаа и при претходниот дуел со Динамо Киев, но тогаш атмосферата не беше ни приближна на сегашната. Сега, секој потег на Гробарите може да има сериозни последици – и за клубот, и за европската сезона.