Унгарскиот премиер Виктор Орбан остро ја нападна миграциската политика на Европската унија, откако двајца унгарски државјанки беа брутално нападнати во Катанија, Италија, од група мигранти. Инцидентот, кој заврши со уапсени напаѓачи, повторно ја отвори дебатата за безбедносните ризици од нелегалната миграција и односот на Брисел кон овој проблем.

Орбан преку објава на Фејсбук му се заблагодари на италијанскиот заменик-премиер Матео Салвини за, како што рече, „застанувањето во одбрана“ на младите девојки од Унгарија. „Овој напад е директен доказ дека миграциската политика на Европската комисија е неприфатлива“, истакна Орбан.

Според него, наместо да ја сопрат миграцијата, европските институции се занимаваат со „правни игри и бирократски сплетки“. Тој оцени дека неуспехот на Брисел директно придонел до вакви инциденти, и дури отиде чекор понатаму обвинувајќи ги „бриселските бирократи“ дека носат дел од одговорноста за случајот на сексуално насилство. „Овој случај паѓа на нивна совест. Не може повеќе вака“, предупреди Орбан и повика на „бунт против Брисел“.

Инцидентот се случил кога тројца мигранти им понудиле превоз на двете девојки кои се враќале од плажа. Наместо тоа, ги однеле на затскриено место и почнале да ги малтретираат. Случајот завршил со нивно апсење, а според официјалните информации сите тројца се наоѓале во Италија илегално.

Орбан го искористи овој трагичен настан за уште еднаш да испрати порака до Европската комисија дека е време за радикална промена на политиката, бидејќи – како што нагласи – „граѓаните на Европа не смеат да бидат жртви на нечија погрешна агенда“.