Белата куќа разгледува опција украинскиот претседател Володимир Зеленски да добие покана да присуствува на претстојниот состанок меѓу американскиот претседател Доналд Трамп и рускиот лидер Владимир Путин, што треба да се одржи во Алјаска на 15 август, објави NBC News.

Иако формална покана сè уште не е испратена, висок претставник на американската администрација изјавил дека ваков троен состанок е „апсолутно можен“ и дека во Вашингтон постои надеж дека сценариото ќе се реализира.

Трамп веќе изјави дека САД се „многу блиску до договор“ за прекин на војната меѓу Русија и Украина, кој, според него, би вклучувал „размена на територии на начин што ќе биде во корист на двете страни“.

Зеленски, од своја страна, јасно предупреди дека Украина нема да прифати откажување од окупираните територии во корист на Русија. Тој потсети дека претходната анексија на Крим во 2014 година не ја спречила понатамошната руска агресија, туку напротив – ја охрабрила Москва да продолжи со воените дејствија.

Од руската страна, позицијата останува непроменета – Москва инсистира Крим, заедно со уште четири украински региони, да бидат признати како дел од Руската Федерација.

Во меѓувреме, во заедничка изјава објавена во неделата, лидерите на Велика Британија, Франција, Италија, Германија, Полска, Финска и Европската комисија истакнаа дека „патот кон мир во Украина не смее да се одлучува без учество на Украина“. Тие порачаа дека секое дипломатско решение мора да ги гарантира клучните безбедносни интереси на Украина и Европа, со силни и веродостојни гаранции за украинскиот суверенитет и територијалниот интегритет.

Во документот се нагласува и дека „тековната линија на контакт треба да биде почетна точка за преговори“, но истовремено се подвлекува дека меѓународните граници не смеат да се менуваат со сила.