Американската јавна обвинителка Пам Бонди нареди отворање на постапка за можна завера против Доналд Трамп, поврзана со наводите за руско мешање во претседателските избори во 2016 година.

Според Би-би-си, обвинителите наскоро ќе изнесат докази пред голема порота, која ќе треба да одлучи дали ќе бидат покренати обвиненија. Сè уште не е познато против кого би се водела постапката.

Трамп со години тврди дека обвиненијата за врски со Русија се „политички измислици“. Минатиот месец, директорката на Националната разузнавачка служба, Тулси Габард, директно го обвини Барак Обама и неговиот тим за „долгогодишен државен удар“ против Трамп. Според неа, информациите биле политизирани со цел оцрнување на Трамп како „човек на Кремљ“.

Во меѓувреме, беше декласифициран документ од 2016 година, во кој стои дека Хилари Клинтон наводно одобрила стратегија за поврзување на Трамп со Русија, што повторно ја отвори темата во јавноста.

Иако специјалниот советник Џон Дарем не пронајде докази за кривична завера во ФБИ, во својот извештај од 2023 година заклучи дека почетната истрага се базирала на „непотврдени и неанализирани информации“.