Американскиот министер за финансии Скот Бесент ги повика европските држави да бидат подготвени да се вклучат во нов бран на построги економски мерки против Кина и други земји кои продолжуваат да купуваат руска енергија, предупредувајќи дека досегашната реакција од Европа била млака.

Бесент објасни дека санкциите кон Русија би можеле да се засилат или олеснат, зависно од исходот на претстојниот состанок меѓу американскиот претседател Доналд Трамп и рускиот претседател Владимир Путин, закажан за петок. Сепак, според него, европските сојузници мора во секој случај да ја поддржат иницијативата за зголемување на притисокот.

„Европејците треба да ни се приклучат во овие санкции. Мора да го сторат тоа. Време е за дела, а не за зборови“, изјави Бесент во интервју за „Блумберг“.

Тој потсети дека САД веќе вовеле секундарни тарифи за Индија поради купување руска нафта, а доколку состојбата не се подобри, истото може да се направи и со други земји, вклучително и со Кина. Како пример, наведе дека администрацијата на Трамп одлучила да наметне дополнителна тарифа од 25% на увозот од Индија – над постојната царина од 25%, со што вкупниот товар достигнува 50%, што предизвикало остри реакции во Делхи.

Од почетокот на руската инвазија врз Украина во февруари 2022 година, САД, Европската Унија, Јапонија и други партнери воведоа повеќе бранови санкции против Москва. Во јули, ЕУ го усвои 18-тиот пакет санкции, кој повторно опфати и мерки за руската енергетска индустрија.

Бесент, зборувајќи за состанокот на Г7 во Канада, рече дека имал директно прашање до европските лидери:
„Ги погледнав сите околу масата и прашав – дали сте подготвени да воведете 200% секундарна тарифа за Кина? А знаете што? Повеќе беа заинтересирани за тоа какви чевли носат“.

Тој најави дека претседателот Трамп на средбата со Путин ќе стави до знаење дека „сите опции се на маса“ во однос на идните економски и политички мерки кон Русија и нејзините трговски партнери.