Првите 100 дена на новата влада

Новата германска влада предводена од канцеларот Фридрих Мерц (ЦДУ) се приближува до своите први 100 дена на власт – период што традиционално се смета за момент на прва политичка проценка. Наместо позитивен биланс, анкетата „Дојчландтренд“ покажува масовно незадоволство кај граѓаните.

Мерц досега најмногу се истакнуваше на надворешнополитичкиот фронт – средба со американскиот претседател Доналд Трамп, поддршка за Украина, како и повици кон израелскиот премиер Бенјамин Нетанјаху да покаже воздржаност во Газа. Во внатрешната политика, владата воведе построг курс кон миграцијата.

Силни критики за владата и канцеларот

Според истражувањето, 69% од Германците се незадоволни од работата на владата, а 65% директно од Мерц. Дури половина од анкетираните сметаат дека тој не е дораснат за функцијата, а 56% веруваат дека нема капацитет да ја води државата во кризни времиња.

Олабавувањето на строгата „кочница за задолжување“ и планот за инвестиции од 500 милијарди евра во инфраструктура и модернизација на армијата предизвикаа пад на довербата – 66% од испитаниците велат дека Мерц не е личност на која може да се верува.

Блискиот Исток – чувствителна точка

Судбината на заложниците во рацете на Хамас е приоритет за 72% од Германците. Сепак, 66% сметаат дека владата треба да врши поголем притисок врз Израел за промена на курсот во Газа. Само 31% сè уште ја поддржуваат традиционалната германска позиција за „посебна одговорност“ кон Израел.

Загриженост за економијата поради Трамп

Новите царини на американскиот претседател Доналд Трамп предизвикуваат силна загриженост кај 65% од Германците, особено поради договорот со ЕУ за царини на одредени производи, што предизвика бројни контроверзии.

Политички тренд кон десно

АфД, екстремно десната партија, ја зголемува својата поддршка на 24%, додека ЦДУ/ЦСУ се на 27%. СПД, Зелените и Левицата остануваат на истите нивоа. Политичката сцена во Германија станува сè пополаризирана, а поддршката за традиционалните партии слаби.