Милијардерот се вклучи во германската кампања

Американскиот милијардер Илон Маск преку својата платформа Икс (Х) повторно ја потресе германската јавност со директна поддршка за десничарско-популистичката партија Алтернатива за Германија (АфД).

„Или Германија ќе гласа за АфД или тоа ќе биде крај за Германија,“ напиша Маск, пред локалните избори закажани на 14 септември во најнаселената германска покраина Северна Рајна-Вестфалија.

Реакции на политичката сцена

Изјавата дојде откако речиси сите останати партии – Христијанско-демократската унија, Социјалдемократите, Зелените и нивните партнери – објавија заедничка декларација дека кампањата не треба да се води „на грбот на мигрантите“. АфД, која не била поканета да се приклучи, веднаш порача дека и да била поканета – немало да учествува.

АфД како „единствен глас“ за миграцијата

Партијата и нејзините поддржувачи тврдат дека АфД е единствената политичка сила која отворено зборува за миграцијата. „Европски конзервативци“ иницијативата на другите партии ја нарекоа напад врз слободата на говорот.

Маск веќе се мешаше во германската политика

Ова не е првпат Маск да се вмеша во германската политика – и во февруари повикуваше граѓаните да гласаат за АфД и објави интервју со партиската лидерка Алис Вајдел.

Испит за новата влада

Локалните избори во Северна Рајна-Вестфалија ќе бидат прв тест за расположението на гласачите откако Владата на Фридрих Мерц дојде на власт во мај.