Франција повторно се најде во сериозна политичка криза. По очекуваниот пад на премиерот Франсоа Бајру, кој доби недоверба во Националното собрание, француската политичка сцена се соочува со неизвесност и атмосфера на песимизам.

Поранешниот премиер Мишел Барние, гледајќи го во живо падот на неговиот наследник, му испрати порака со која предупреди дека земјата оди кон нешто „уште посериозно од хаос“. Оваа реакција дојде откако и самиот Бајру предвидеше дека „се подготвува хаос за Франција“.

Претседателот Емануел Макрон остана без политички „громобран“ во момент кога се испреплетуваат социјални, буџетски и институционални кризи. Оставката на Бајру ја отвора вратата за ново назначување на премиер, но изборот станува сè потежок.

Демонстрантите низ француските градови го прославија падот на владата, организирани од движењето „Блокирај сè“, додека рејтинг-агенциите и синдикатите најавуваат дополнителни притисоци врз владата. Во ваква клима, Макрон мора да најде наследник на Бајру „во следните неколку дена“, како што порача Елисејската палата.

Во јавноста веќе се отвори дилемата дали новиот премиер би можел да дојде од редовите на Социјалистичката партија. Лидерот на ПС, Оливие Фор, изјави дека сака влада која ќе ги вклучи левицата и екологистите, но неговите услови се сметаат за тешко прифатливи за Макрон. Од другата страна, дел од Републиканците предупредуваат дека нема да толерираат коалиција со социјалистите, што дополнително го усложнува просторот за маневрирање.

Во вакви услови, политичкиот табор на Макрон се соочува со длабоки поделби. Некои негови блиски соработници бараат „пресврт во методите на владеење“ и поделба на моќта, но претседателот останува внимателен. Поранешниот премиер Габриел Атал оцени дека Франција и понатаму ги плаќа последиците од претходното распуштање на парламентот, кое го нарече „касетна бомба за државата“.

Во сенка на целата криза, најмногу профитира Националниот собир на Марин Ле Пен. Таа бара брзо распуштање на Собранието, уверена дека новите избори би ја засилиле нејзината партија. Ле Пен дури најавува дека доколку нејзиниот табор освои мнозинство, ќе инсистира и на оставка на самиот претседател Макрон.

Со тоа, Франција е пред прашање: дали ќе добие социјалист како нов премиер, дали Макрон ќе се реши за компромис со десницата, или ќе се соочи со неизбежно распуштање на Собранието што би можело да ја зацврсти позицијата на крајната десница?