Кантон, Охајо / Вашингтон – Американскиот потпретседател Џеј Ди Венс денеска ја потресе политичката сцена со директни обвинувања кон претходните американски администрации, обвинувајќи ги за „прикривање“ на случајот со Џефри Епстин – контроверзниот финансиер обвинет за сексуална експлоатација.

Во обраќање од сојузната држава Охајо, Венс изјави дека претседателот Доналд Трамп наложил целосна транспарентност и нова истрага поврзана со Епстин, обвинувајќи ги Џозеф Бајден, Барак Обама и Џорџ В. Буш за молчење и пасивност околу случајот.

„Претседателот му нареди на државниот обвинител да ги објави сите достапни информации и да најде дополнителни веродостојни докази за мрежата околу Епстин. Тоа е важен приоритет на оваа администрација,“ изјави Венс.

Тој додаде дека во постојана комуникација е со обвинителката Пам Бонди, која активно работи на ова прашање, додавајќи дека „нема повеќе време за премолчување.“

Во изјавата, Венс остро ги нападна неговите претходници:

„Администрациите на Обама и Буш го третираа Епстин со ракавици. Тие не покажаа желба да ја откријат вистината, иако тој беше педофилски олош. А сега, кога Трамп бара вистина, тоа се користи како критика кон него!?“

Контроверзниот случај повторно добива политичка тежина. Иако Епстин почина во затвор во 2019 година под сомнителни околности – официјално пријавен како самоубиство – прашањата околу неговата мрежа на влијание и можните поврзаности со познати имиња остануваат тема на јавен интерес.

Интересен детал кој се повторно исплива на површина е поврзаноста на Алекс Акоста, поранешен федерален обвинител кој за време на администрацијата на Буш му дозволи на Епстин да избегне федерални обвиненија. Акоста подоцна стана секретар за труд во првата администрација на Трамп.

Претседателот Трамп пак, ги демантираше медиумските извештаи дека неговото име било поврзано со активности на Епстин, нагласувајќи дека не бил свесен за наводното „непристојно писмо“ во кое се спомнува неговото име, поврзано со албум кој го составила Гислејн Максвел во 2003 година.