Психијатриски вештачења во спротивставување – се одлучува судбината на обвинетиот за трговија со дрога

Раде Трајковски, познат под прекарот Штекли, кој е еден од десеттемина обвинети за организирана трговија со дрога, наскоро ќе се соочи со одлука од Судот: дали е психички способен да го следи судскиот процес или навистина страда од сериозно ментално нарушување.

Одбраната: Штекли халуцинира и мисли дека го следи мафија

Адвокатскиот тим на Штекли пред месец и половина доставил вештачење до Кривичниот суд, според кое обвинетиот има дијагностицирана шизофренија. Според ова тврдење, тој халуцинира и верува дека е следен од албанска мафија, поради што не е во состојба активно да учествува во постапката и треба да биде хоспитализиран на Клиниката за психијатрија.

Психијатри од Бардовци со спротивна дијагноза: Штекли е свесен и пресметлив

Обвинителството за организиран криминал побарало дополнително вештачење, па тим од психијатри од болницата во Бардовци го посетил обвинетиот во притвор. Нивната проценка е целосно спротивна – според нив, Штекли е психички стабилен, свесен и способен да го следи судењето.

Адвокатот Дуковски: Не сме лекари, судот ќе одлучи

– Ние сме правници, не сме форензичари. На следното рочиште очекуваме соочување на вештите лица на одбраната и обвинителството – изјави адвокатот Сашко Дуковски. Тој посочи дека одбраната добила обемно психијатриско вештачење од 26 страници, кое тврди дека неговиот клиент не може да ја следи постапката поради психичко заболување.

Четворица признале вина – Штекли не попушта

На денешното рочиште, четворица од обвинетите го признале делото. Дуковски коментираше дека тоа е лична одлука на секој од обвинетите и нема влијание врз останатите, вклучително и неговиот клиент.

Долга истрага, спогодби и казни

Обвинителството ги товари десетмината за организирана продажба на дрога, главно во скопската населба Аеродром. Истражната постапка траела скоро една година и вклучувала специјални истражни мерки. Првично биле осомничени 16 лица, но седум од нив прифатиле вина и веќе добиле затворски казни од 3 до 3,5 години по спогодби со обвинителството.