Претседателката на Европската комисија, Урсула фон дер Лајен, повтори дека процесот на проширување на Европската Унија останува приоритет за Унијата, бидејќи тоа е важно не само за економијата и стабилноста, туку и за безбедноста на целиот континент. Таа истакна дека проширувањето е процес базиран на заслуги – секоја земја-кандидат ќе биде оценета врз основа на своите постигнувања, реформите што ги спроведува и подобрувањата што ги постигнува, без никакви „планови Б“ или алтернативни патишта.

Во одговор на прашање на новинар за тоа дали на македонскиот премиер Христијан Мицкоски му било кажано дека Македонија нема да добие алтернатива за членство во ЕУ, фон дер Лајен не даде директен одговор, но повтори дека клучно е Европската Унија да го поддржи процесот на интеграција базиран на заслуги и напредок на секој кандидат.

Таа посочи дека проширувањето е важно за Европа затоа што поголема и посилна ЕУ ќе има поголема тежина во светот. Исто така, нагласи дека мешањето на трети страни, особено на Русија во Западен Балкан и во Молдавија, бара од Унијата да стои зад своите партнери, да ги поддржи и заштити од хибридни напади и надворешни влијанија, овозможувајќи им на државите сами да изберат дали сакаат да бидат дел од Унијата.

Фон дер Лајен истакна дека процесот на проширување бара време, но е од суштинско значење за стабилноста, безбедноста и просперитетот на регионот. Секоја кандидатска земја ќе биде оценета според јасни критериуми и достигнати резултати, што гради доверба меѓу Унијата и кандидатите и гарантира успешен процес на интеграција.

Денешната изјава е дадена за време на еднодневната посета на Бугарија, дел од турнејата на фон дер Лајен низ седум земји во близина на Украина. Во рамки на посетата, таа заедно со бугарскиот премиер Росен Жељазков го посетија најголемото државно воено претпријатие во Бугарија – „Вазовски машиностроителни заводи“ во Сопот.