„Сѐ поочигледен пад на ВМРО-ДПМНЕ“

Претседателот на СДСМ, Венко Филипче, во интервју за Телма остро ја критикуваше власта и премиерот Христијан Мицкоски. Според него, ВМРО-ДПМНЕ е во сериозен пад и веќе губи над 100.000 до 120.000 гласови, поради што свесно отвора простор за изборни неправилности.

Неспособност и префрлање вина

Филипче потсети на изјавата на премиерот, кој дури и по една година од формирањето на новата влада за главни виновници во државата ги обвинува СДСМ и ДУИ. „Тоа само ја покажува целосната неспособност и немањето капацитет за водење држава,“ изјави лидерот на СДСМ.

Контроверзија околу Изборниот законик

Според Филипче, власта намерно чекала до последен момент да предложи измени на Изборниот законик, и тоа откако изборите веќе биле распишани, иако Уставниот суд одамна донесе одлука за укинување на делот со потребниот број потписи за независни листи. Дополнителна вина, според него, е и тоа што коалицијата не обезбедила поддршка од партнерите од ВЛЕН.

„Ловење во матно“

Филипче е дециден дека ова е обид на ВМРО-ДПМНЕ и коалицијата да „ловат во матно“ и да ги искористат можните злоупотреби во своја корист.

Најава за будно следење на изборите

Првиот човек на СДСМ најави дека партијата ќе биде на штрек и ќе ги следи сите можни злоупотреби и тактики на власта. „Ќе реагираме соодветно и ќе ја браниме демократијата во изборниот процес,“ порача Филипче.