Денешната седница во македонското Собрание започна со пауза и политички тензии, откако на дневен ред се најде интерпелацијата за јавниот обвинител Љупчо Коцевски. Предлогот доаѓа од партијата Левица, која го обвинува Коцевски за нефункционалност, политички влијанија и низа афери што, според нив, ја поткопале довербата во обвинителството.

Иако јавниот обвинител тврди дека интерпелацијата е правно неоснована бидејќи не постои како инструмент во Законот за јавно обвинителство, опозициската партија се повикува на Уставот и бара негова смена.

Што се случува во Собранието?

Седницата започна, но веднаш беше прекината по барање на пратеничката група на Европскиот фронт предводен од ДУИ. Очекувањата се дека ќе се води жестока дебата пред да дојде до гласање, а клучното прашање е – како ќе се постави владејачката ВМРО-ДПМНЕ?

Премиерот Христијан Мицкоски вчера изјави:

„Јавноста ќе види утре, но ние како политичка партија и јас како човек не ги менувам ставовите преку ноќ“.

Четири точки на обвинување

Во документот доставен до Собранието, Левица посочува четири главни аргументи:

1. Селективни истраги – особено во случајот со пожарот во дискотеката „Пулс“ во Кочани, во кој загинаа 62 лица.

2. Политички влијанија – тврдат дека обвинителството дејствува под диктат на политички структури.

3. Хаос во Вишото обвинителство во Скопје – спорен избор и суспензија на обвинители.

4. Непостапување за урбаната мафија во Скопје – сомнително молчење за дивоградби и корупциски афери.

Левица, исто така, го доведува во прашање и фактот дека Владата претходно почна постапка за разрешување на Коцевски, но потоа ја стави во мирување – токму во периодот кога се отвори истрага за трагедијата во Кочани.

Политички калкулации

Засега е извесно дека ЗНАМ ќе гласа „за“ интерпелацијата, додека СДСМ ќе биде „против“. Одлуката на ВМРО-ДПМНЕ може да биде пресудна. Коцевски е на функција од февруари 2024, кога беше избран со поддршка од тогашното парламентарно мнозинство предводено од СДСМ и ДУИ.