Во денешното издание на емисијата „Стадион“ гостуваше интервентниот кардиолог Сашко Кедев, кој јавно алармираше за сериозни злоупотреби во здравствениот систем. Според него, во некои приватни болници се изведуваат непотребни интервенции врз пациенти, само со цел профит, при што директно се загрозува нивното здравје и живот.

Кедев објасни дека голем дел од неговата работа како консултант е да ги одвраќа луѓето од непотребни операции и стентирања. Тој предупреди дека ситуацијата е „застрашувачка“, бидејќи има појава на хируршки зафати, па дури и отворање на граден кош без никаква медицинска потреба.

„Имаме докази за вакви случаи. Во Англија или Америка вакви центри веднаш би биле затворени“, рече Кедев, додавајќи дека е неприфатливо ова да продолжи без институционална реакција.

Тој ја повика државата, конкретно Министерството за здравство и Фондот за здравствено осигурување, да реагираат веднаш, бидејќи тие се оние што ги плаќаат дел од овие интервенции. „Зборуваме за сериозни етички проблеми поврзани со профитот“, заврши Кедев.