ВМРО-ДПМНЕ синоќа на седница на Извршниот комитет донесе важна стратегиска одлука за претстојните локални избори: партијата нема да истакне сопствени кандидати за градоначалници во Куманово и во Центар, туку ќе застане зад кандидатите на својот коалициски партнер ЗНАМ. Неофицијално, тоа значи поддршка за актуелниот градоначалник Максим Димитриевски во Куманово и за Мирослав Лабудовиќ во Центар.

На теренот веќе е познато и со кого ќе влезат во изборна трка: СДСМ го кандидира Мартин Костовски за Куманово и актуелниот градоначалник Горан Герасимовски за Центар. Дополнителна динамика носат и независните кандидати – во Центар ќе настапи Билјана Ивановска со поддршка од иницијативата „Независни заедно“, додека во Куманово влегуваат во трка Горан Стојковски – Диро од „Ред за Куманово“ и Нинослав Јакимовски.

Иако се шпекулираше дека ВМРО-ДПМНЕ ќе се повлече и во Кичево, сепак ИК предложи кандидат – Александар Јовановски. Со тоа, партијата утврди имиња за уште 16 општини низ државата. Меѓу нив е и Ерџан Демир за Шуто Оризари, кој беше вработен пред само еден месец во М-НАВ на оглас што беше оценет како компромитиран поради тоа што бил наменет само за партиски кадри.

Останатите кандидати се:

• Јане Мицески (Сопиште)

• Александар Јовановски (Кичево)

• Оливер Алексовски (Крива Паланка)

• Омер Јакупоски (Маврово и Ростуше)

• Сашо Ронковски (Кривогаштани)

• Нико Чонески (Крушево)

• Ѓоко Камчев (Валандово)

• Митко Костадиновски (Виница)

• Никола Недоски (Демир Хисар)

• Јордан Костадинов (Чешиново-Облешево)

• Љупчо Почиганец (Радовиш)

• Дејан Андоновски (Чашка)

• Дејан Проданоски (Прилеп)

• Петар Јанков (Струмица)

• Благој Ацев (Неготино)

За Кисела Вода, како што рече генералниот секретар Ѓорѓија Сајкоски, сè уште се прават анкети и наскоро ќе биде соопштено конечниот кандидат.

„Убедени сме во способноста на секој еден избран кандидат. Тоа се луѓе кои се докажани во своите области и сектори на работа,“ изјави Сајкоски.

Локалните избори ќе се одржат во два круга – првиот на 19 октомври, а вториот на 2 ноември.