Некои соништа изгледаат недостижни, но за оние што имаат волја и истрајност – ништо не е невозможно. Тоа го докажа и македонскиот маратонец Евгениј Поп Ацев, троен светски шампион, кој го оствари својот голем животен сон и стана петтиот Македонец што го препливал каналот Ла Манш.

Овој подвиг, кој важи за „светиот грал“ на маратонското пливање, Поп Ацев го реализира за 9 часа и 43 минути, минувајќи низ бурни води, силни струи, ноќно пливање и средби со медузи и морски сообраќај.

„Ла Манш беше моја желба уште од почетоците на кариерата, но дури сега, по завршување на активните натпревари, најдов време да се посветам на овој предизвик,“ вели Евгениј. Претходно двапати бил спречен – еднаш поради неуспех, другпат поради лоши временски услови.

За да издржи во студената вода, Поп Ацев се подготвувал речиси две години. Пливал во езера и мориња со ниска температура, ја менувал исхраната и ја тестирал психичката издржливост. И покрај тоа, во текот на пливањето се соочил со два критични моменти – кога ноќе силниот ветар му го отежнал патот и кога пред самиот крај струјата го однела подалеку од целта. Но, како што вели, откажување не било опција.

Интересен момент бил и пловењето меѓу огромни бродови: „Бев како полжав на автопат, а мојот капетан вешто ме водеше низ морскиот сообраќај,“ раскажува Поп Ацев.

Кога конечно стигнал до францускиот брег, го опишал чувството како „неописливо“. Од возбуда заборавил да земе камче од плажата – традиција кај пливачите што го минуваат Ла Манш.

Поп Ацев е дел од елитната група Македонци што го совладале овој предизвик: Нико Нестор (1959), Атина Бојаџи (1969), Томи Стефановски (2009) и Игор Димовски (2010). Со својот подвиг, тој уште еднаш ја впиша Македонија на светската спортска мапа.

Иако вели дека во иднина сака да се фокусира на фамилијата и професионалниот живот, не ја исклучува можноста за нови предизвици, затоа што – како што признава – ужива во целиот процес: подготовките, пливањето и чувството на триумф.