Во Фејсбук групата „Ново Лисиче“ утрово беше објавено вознемирувачко видео кое ја прикажува состојбата со загадениот воздух во Скопје. Според снимката, густата токсична магла била видлива со голо око пред основното училиште „Лазо Ангеловски“.

Жителите алармираат дека во вакви услови денес учениците од населбата морале да одат на настава, додека малите деца биле носени во градинка, и тоа во амбиент кој граѓаните го опишуваат како „токсичен и неподнослив“.

Загрижените жители најавија и протест, кој ќе се одржи вечерва во 18 часот пред Мостот Близнаци. Во повикот се истакнува дека граѓаните не смеат да останат рамнодушни кон оваа состојба, бидејќи најмногу страдаат најмладите.

„Токму заради децата не смееме да отстапиме. Ова е повик на одговорност. Има ли поголема причина за да не бидеме ладнокрвни пред ова лудило? Сите мораме да се избориме за почист воздух и похумани услови за живот“, стои во повикот.

Случајот уште еднаш ја отвора темата за долготрајниот проблем со аерозагадувањето во Скопје, кој во зимските месеци редовно достигнува алармантни нивоа и директно влијае врз здравјето на граѓаните.