Светот на модата изгуби една од своите најиконични фигури – Џорџо Армани, легендарниот италијански дизајнер и основач на глобалната империја „Армани“, почина на 91-годишна возраст. Веста ја потврди неговата компанија со порака исполнета со тага: „Со бескрајна тага, групацијата Армани го објавува заминувањето на својот креатор, основач и неуморна движечка сила“.

Армани беше човекот што го редефинираше машкото и женското облекување со концептот на „меко моќно облекување“ – лесни костуми со флуидни линии и ненаметливи бои. Со ова, тој ја доби титулата „Крал на блејзерот“, а неговата пригушена палета на сива и беж стана симбол на суптилна елеганција и „тивок луксуз“.

Неговиот пробив на меѓународната сцена дојде во 1980 година кога актерот Ричард Гир носеше костуми на Армани во филмот Американски жиголо, со што започна неговата длабока врска со Холивуд. На црвениот тепих, негови дизајни носеа Дајан Китон, Џоди Фостер, Џулија Робертс и многу други, оставајќи незаборавни модни моменти.

Роден во Пјаченца во 1934 година, Армани првично студирал медицина, но ја напуштил пред дипломирање и дури случајно влегол во модниот свет. Работел како декоратер на излози и продавач во стоковната куќа „Ла Ринасенте“ во Милано, а потоа како дизајнер кај Нино Черути. На 41 година го основал својот бренд, заедно со партнерот Серџо Галеоти, кој го убедил да го продаде својот „фолксваген буба“ за да ја финансира компанијата.

И покрај бројните понуди да стане дел од големите модни конгломерати, Армани остана независен и ја опишуваше таа независност како суштинска вредност. Со тек на децении, неговото име се прошири надвор од модата – во хотели, ресторани, ноќни клубови, козметика, па дури и чоколади и цвеќарници.

Во 2021 година неговите брендови остварија приходи од над 3,5 милијарди фунти. Иако последните месеци од здравствени причини не присуствуваше на модните ревии, се очекуваше да биде централна фигура на прославата на 50-годишнината на неговиот бренд.

Во интервју од 2022 година, на прашањето како би сакал да остане запаметен, Армани одговори едноставно:
„Како искрен човек. Го кажувам тоа што го мислам.“