Тужба за антитруст практика

Компаниите на Илон Маск – xAI и Х (поранешен Twitter) – поднесоа масовна антитруст тужба во федералниот суд во Тексас против Apple и OpenAI.
Во 61-страничната тужба се наведува дека двете корпорации склучиле „незаконски ексклузивен договор“ со кој ChatGPT станува единствениот генеративен АИ што е интегриран во iPhone, додека конкурентите – како Grok на Маск – се блокирани.

„Два монополисти“

„Ова е приказна за два монополисти кои се здружија за да ја обезбедат својата доминација во светот управуван од најмоќната технологија што човештвото ја создало – вештачката интелигенција“, стои во тужбата.
Според наводите, Apple контролира 65% од американскиот пазар на смартфони, а OpenAI држи најмалку 80% од пазарот на генеративни АИ чат-ботови.

Што бара Маск?

Маск бара милијарди долари оштета и трајна забрана за, како што тврди, антиконкурентските практики. Тужбата наведува дека Apple ја манипулира App Store листата во корист на ChatGPT и намерно го одложува одобрувањето на апдејти за апликацијата Grok.

Реакциите

OpenAI за AFP одговори дека „оваа тужба е уште еден пример за шаблонот на вознемирување од страна на г-дин Маск“.
Apple засега нема коментар.

Овој судски потег следи по серијата јавни препукувања меѓу Маск и извршниот директор на OpenAI, Сем Алтман. Алтман го нарече Маск „манипулатор“, обвинувајќи го дека ја користи платформата Х за да им наштети на конкурентите. Маск, пак, го нарече Алтман „лажго“.

Од основач до жесток противник

И двајцата беа меѓу првите основачи на OpenAI во 2015 година, но Маск се повлече во 2018-та. Во 2023 ја основа xAI, директен конкурент на OpenAI, за да се натпреварува во пазарот на генеративна вештачка интелигенција кој експлодира по лансирањето на ChatGPT кон крајот на 2022.