Најава за првата заедничка воена вежба помеѓу Србија и Кина – под името „Давид и Голијат“ – предизвика силна реакција кај западните партнери на Белград. Иако содржината на вежбата сама по себе не е стратешки значајна, симболиката зад неа носи голема тежина, особено во време на глобални тензии и растечка геополитичка поделеност.

Според портпаролот на кинеското Министерство за одбрана, Жанг Бин, вежбата која ќе се одржи во провинцијата Хебеј има за цел зближување и унапредување на борбените капацитети на двете армии. Србија и Белорусија се единствените европски земји кои ќе вежбаат со кинеската армија – исклучувајќи ги Русија и Азербејџан како евроазиски играчи.

Воените аналитичари предупредуваат дека вежбата има политичка тежина. Србија, која официјално се декларира како воено неутрална, ќе мора да одговори на зголемените очекувања – особено од страна на Европската унија и трансатлантските партнери. Прашањето што се поставува: до кога Белград ќе може да балансира помеѓу Истокот и Западот?

Аналитичарот Александар Радиќ објаснува дека досегашната соработка со Кина се сведуваше на набавка на оружје и техничка размена, но оваа вежба е прв сигнал за продлабочување на директна воена соработка.

„Содржината на вежбата е помалку важна. Поважно е тоа што европска земја – членка на НАТО Партнерството за мир – прави маневри со кинеската армија“, вели Радиќ.

Во време кога Кина преку иницијативата „Еден појас, еден пат“ го зголемува своето економско влијание на Балканот, оваа вежба е дочекана како симболичко влегување на Пекинг и на безбедносен план во срцето на Европа – преку Србија.