Хрватските вооружени сили направија уште еден голем чекор во модернизацијата на својата армија – воена церемонија во касарната „Потполковник Марко Живковиќ“ во Плесо го одбележа пристигнувањето на новиот систем на беспилотни летала „Бајрактар TB2“.

По неодамнешното воведување на француските повеќенаменски ловци „Рафал“, оваа набавка ја потврдува стратегијата на Хрватска за засилување на воздушната моќ и подигање на безбедносниот капацитет на армијата на повисоко ниво.

Во рамките на договорот, Хрватска доби шест дрона „Бајрактар TB2“, кои ќе бидат ставени под команда на 125-та извидувачко-борбена ескадрила на хрватските военовоздухопловни сили. Пакетот содржи и целосна инфраструктура: командно-контролен центар, симулатори за обука, копнени контролни станици, системи за пренос на податоци, резервни делови, вооружување, како и логистичка и техничка поддршка. Турската компанија Baykar ќе обезбеди техничари во Хрватска во наредните две години, со можност за дополнителни обуки на персоналот во Турција.

Министерот за одбрана Иван Анушиќ изрази задоволство од демонстрацијата на новата технологија, при што истакна дека хрватските офицери се веќе обучувани во Турција. „Бајрактар“ не е само борбен систем – неговите можности се разновидни: разузнавање, електронска војна, надзор, прецизни удари, но и цивилни мисии како трагање и спасување.

Началникот на Генералштабот, генерал Тихомир Кундид, порача дека дроновите повеќе не се само поддршка, туку клучен дел од борбената моќ на современите армии. Со „Бајрактар“ и дополнителни технологии како FPV-дронови, хрватската армија се позиционира на стратегиско ниво и станува дел од глобалниот тренд на дигитализација и автономни системи во војувањето.

Со оваа набавка, Хрватска стана дел од групата од 37 држави во светот, меѓу кои и членки на НАТО, кои го користат „Бајрактар TB2“ – доказ за довербата во ова летало кое се прослави во повеќе современи конфликти.