Дезинформациите на Западен Балкан се претвораат во постојан предизвик. Штетните кампањи не се случајни – тие најчесто се насочени кон најважните политички и општествени настани, со цел, како што пишува „Вистиномер“ во билтенот „Disinfo Radar: Watch and Warn“, „да ја поткопаат довербата во демократските институции и да ја разнишаат поддршката за евроатлантската интеграција“.

Регионално: Изборите како „фабрика за лаги“

Во следните месеци целиот регион влегува во политички наелектризирана сезона. Во Северна Македонија, Косово и Република Српска ќе има избори, додека во Србија растат барањата за предвремени избори. Според „Вистиномер“, „информативниот простор веројатно ќе биде преполн со наративи што ја прикажуваат демократијата како неуспешен модел и ја засилуваат странската мека моќ што ги поддржува фаворизираните политички кандидати“. Српските медиуми, велат експертите, ќе имаат стратешка улога во креирањето на јавниот дискурс во 2025 година.

 Албанија: Полициски упад како оружје за поделба

Во Албанија, инцидентот со полицискиот упад во „Фокус Медиа Груп“ на 24 август станува нова алатка за дезинформациски кампањи. „Вистиномер“ предупредува: „Полицискиот упад врз ‘Фокус Медиа Груп’ привлече значително внимание, што ја прави слободата на печатот веројатна тема на идните напори за дезинформација“. Очекувајте поларизација: едни ќе го користат случајот како доказ за „диктатура“, други како легитимна борба против криминал.

БиХ и Република Српска: Идентиет, референдуми и фудбал

Во Република Српска, најавените предвремени претседателски избори и референдумот ќе бидат претставувани како доказ за „претерување на Западот“. „Смената на Милорад Додик и поврзаните судски пресуди ќе се користат за наративи дека станува збор за напади врз српскиот идентитет, зголемувајќи ги заканите за отцепување,“ стои во извештајот.

И спортот не е поштеден. Натпреварот БиХ – Израел закажан во Мостар на 5 септември, според „Disinfo Radar“, „многу веројатно ќе биде искористен за создавање наративи што ќе ги претстават Бошњаците како поддржувачи на Хамас“.

Косово: Северот повторно ризична точка

Претстојните локални избори во северно Косово повторно може да ги разгорија тензии. „Вистиномер“ предвидува: „Медиумите поврзани со Србија веројатно ќе го прикажат процесот како доминиран од албанските националистички интереси“. Дополнително, продолжениот институционален ќорсокак околу мандатот за нова влада ќе се користи за еродирање на довербата во косовските институции.

Црна Гора: Закони за протести како алатка за пропаганда

Иако владата во Подгорица ги повлече предлог-законите за протести и надзор, тие оставија простор за манипулации. „Обидот на црногорската влада да донесе рестриктивни закони отвори простор за идни дезинформации,“ пишува „Вистиномер“. Наративот е јасен – власт која сака да ја задуши демократијата.

Северна Македонија: Етничките тензии пред избори

Македонските локални избори на 19 октомври и 2 ноември ќе бидат под сенка на зголемени етнички тензии. „Политичарите, медиумите и мрежите на тролови селективно ги претставуваат неодамнешните инциденти на спортски натпревари како етнички закани,“ наведува „Disinfo Radar“. Целта е јасна – поларизација на јавноста и слабеење на довербата во демократијата.

Србија: Трамп, Путин и антизападниот наратив

По средбата Трамп – Путин во Алјаска, српските медиуми блиски до проруските кругови ќе се обидат да ја претстават Русија како единствен гарант на мирот. „Про-Кремљ медиумите веројатно ќе ги прикажат преговорите како доказ дека Русија, а не Западот, е гарант на стабилноста,“ пишува „Вистиномер“. На тој начин се создаваат антизападни чувства и се цементира прорускиот дискурс.