Општина Солун со нова казнена мерка против непрописно паркирање

Градските власти во Солун започнуваат ригорозна акција против возачите што паркираат каде не треба – со воведување блокатори на тркалата. Мерката важи без исклучок, вклучувајќи ги и туристите, меѓу кои има сè повеќе македонски граѓани кои го посетуваат градот за шопинг и прошетка.

Каде ќе ви стават блокатор?

Блокатори ќе се поставуваат на:

• места резервирани за локални жители,

• рампи за лица со попреченост,

• зони за товарење и истовар.

Станува збор за критични точки каде секое непрописно возило сериозно го попречува сообраќајот и пристапот.

„Имавме случаи кога странци намерно ги вадеа регистарските таблички за да избегнат казна – ова повеќе нема да поминува“, предупредуваат од Општина Солун.

Како да реагирате ако ве блокираат?

Ако забележите дека возилото ви е блокирано и не може да се помести, веднаш јавете се на општинската полиција на број:
📞 +30 2313 317930

Потоа, ќе мора да ја платите казната – само тогаш службите ќе го отстранат блокаторот.

Циапакидис: „Нема повеќе бегање од казна“

Заменик-градоначалникот задолжен за општинската полиција, Костас Циапакидис, објасни:

„Многу туристи ја кинеа казната и си заминуваа дома како ништо да не било. Сега, без уплата, автомобилот останува заклучен. Имавме возила оставени на забрането по 15 дена!“

Мерката важи до крајот на септември – ќе има и засилени контроли

Новата казнена политика ќе се спроведува барем до крајот на туристичката сезона, а контролите ќе се зголемат во зони каде најмногу се движат туристи од Македонија – околината на трговскиот центар „Mediterranean Cosmos“, централната пешачка зона, плоштадот и крајбрежната променада.