Српскиот претседател Александар Вучиќ го започна своето официјално патување во Кина, каде што присуствува на големата церемонија по повод 80-годишнината од победата во Втората светска војна. За време на престојот во Пекинг, Вучич не криеше дека е благодарен на кинескиот лидер Си Џинпинг за постојаната поддршка што Кина ѝ ја дава на Србија, особено во моменти на тешки предизвици.

„Некои можеби ќе кажат дека направив грешка што дојдов овде, но јас гледам на тоа како можност да разговарам со најважните луѓе на светот. Дали навредив со тоа што се сретнав со претседателот на Кина? Секогаш сум сметал дека Србија треба да има партнерство со сите големи земји, и Кина е со нас и во добри и во тешки моменти. Народот и државата никогаш нема да го заборават тоа“, изјави Вучиќ во обраќањето пред новинарите.

Претседателот нагласи дека неговата делегација за време на престојот во Пекинг ќе одржи неколку средби со високи кинески претставници, вклучително и средба со самиот претседател Си Џинпинг, како и разговор со претседателот на кинескиот парламент. Вучиќ истакна дека овие средби се од клучно значење за продлабочување на билатералните односи и за економската соработка помеѓу двете земји.

За време на посетата, српската делегација ќе има можност да се сретне со најмалку 14 кинески компании. Вучиќ оцени дека големиот интерес што Кина го покажува кон Србија е знак за доверба и потенцијал за нови економски проекти. „Ова се компании кои веќе работат во нашата земја, но исто така ќе се запознаеме и со десетина нови компании со кои досега немавме соработка. Ова е од големо значење за развојот на нашата економија“, рече тој.

На прашање за критиките дека патувањето во Пекинг можеби му нанело штета на угледот на Србија, Вучиќ беше категоричен дека целта на посетата е да се отвори пат за стратешки и економски соработки, како и за склучување на билатерални договори со други земји, вклучително со претседателите на Узбекистан и Азербејџан. Тој нагласи дека соработката со овие држави има голема важност, бидејќи ги отвора вратите за нови инвестиции и развојни проекти кои можат да ја зајакнат позицијата на Србија на меѓународната сцена.

„Некои луѓе се прашуваат дали направив штета со ова патување. Но, да не се сретнам со најмоќните луѓе во светот и да не се обидам да ги отворам можностите за Србија – тоа би било многу погрешно. Узбекистан има 45 милиони жители, Баку е во силен економски раст, а Москва и Кина се центри на големи можности. Затоа сметам дека ова е правилна стратегија“, изјави Вучиќ.

Тој додаде дека Србија ќе продолжи да гради стабилни и продуктивни односи со сите големи светски сили, и дека соработката со Кина е само еден дел од пошироката визија за економски и политички напредок на земјата. Посетата на Кина, како што нагласи Вучиќ, е пример за тоа како Србија сака да ја зајакне својата позиција на глобалната сцена и да обезбеди нови можности за своите граѓани и компаниите.