Албанија на 16 септември ќе ја одржи следната меѓувладина конференција со Европската унија, на која ќе биде отворена групата поглавја позната како „Зелена агенда“.

На 2 септември, земјата ја поднесе својата официјална преговарачка позиција за оваа група, а сега е потврдено дека средбата ќе се одржи на 16 септември, објавија регионалните медиуми.

Според најавите, отворањето на сите поглавја ќе заврши на 2 октомври, кога ќе се одржи уште една меѓувладина конференција и ќе биде отворена последната група, посветена на „Земјоделство и кохезија“.

Оценките на медиумите се дека оваа есен е клучна за Албанија, бидејќи отворањето на поглавјата претставува важна обврска, но уште поголем предизвик ќе биде нивното затворање, кое бара долг процес на консултации и усогласување на законодавството со европските стандарди.

Досега Албанија успеа да отвори 4 од вкупно 6 групи поглавја. Тоа се таканаречените „Основи“, кои се најважни и се затвораат последни, веднаш пред членството, како и поглавјата за надворешни односи, за внатрешен пазар и за конкурентност и сеопфатен раст.

Амбицијата на албанската влада е земјата да стане полноправна членка на ЕУ до 2030 година. Сепак, комесарката за проширување, Марта Кос, изрази уште поголем оптимизам, изјавувајќи дека гледа можност Албанија да го оствари тоа веќе до 2029 година.