Академскиот пленум излезе со остар повик Александар Вучиќ веднаш да поднесе оставка од функцијата претседател на Србија, обвинувајќи го за организирање судири и за поддршка на полициската бруталност.

Според нив, синоќа во Нови Сад бил изведен „инсцениран конфликт“, по кој полицијата употребила невидена сила врз студентите и граѓаните.

Во соопштението се нагласува дека Вучиќ бил „режисер“ на овој настан, а тоа, велат, се потврдува со неговиот настап на прес-конференцијата, каде не можел да ја скрие насмевката и задоволството поради насилството врз граѓаните.

Академскиот пленум смета дека секој нормален граѓанин е длабоко шокиран од сцените што се случиле во Нови Сад, а единствено „нечовек“ или „очајна личност која ја брани власта по секоја цена“ може да чувствува радост во такви околности.

Во повикот до јавноста тие ги охрабруваат сите граѓани кои биле жртви на полициска тортура да ги внесат своите искуства во специјалната база на податоци за насилство наречена „За денот потоа“.

Дополнително, Академскиот пленум испраќа предупредување до сите членови на Министерството за внатрешни работи дека наскоро ќе дојде моментот кога секој полицаец индивидуално ќе биде одговорен за прекумерната и неиспровоцирана употреба на сила врз граѓаните.

Со оваа реакција, тие сакаат да потсетат дека ниту власта, ниту полициските структури нема да можат да избегнат одговорност за она што го нарекуваат грубо кршење на човековите права и демократијата во Србија.