Заменик-претседателот на рускиот Совет за безбедност, Дмитриј Медведев, остро реагираше на убиството на американскиот конзервативен активист Чарли Кирк, кое се случи за време на негово обраќање пред студенти во Орем, САД. Кирк, поддржувач на поранешниот претседател Доналд Трамп и водечко лице во движењето Turning Point USA, беше застрелан додека говореше, а подоцна почина во болница од здобиените повреди.

Медведев оцени дека ова злосторство е дел од поширок тренд на зголемена политичка радикализација меѓу луѓето со левичарско-либерални убедувања. Како пример посочи и неодамнешниот обид за атентат врз словачкиот премиер Роберт Фицо.

„Кој е следниот? Можеби е време тимот на МАГА да разбере дека со поддршката на Украина тие всушност поддржуваат убијци“, напиша Медведев на социјалната мрежа X, директно алудирајќи дека американската поддршка за Киев е поврзана со ваквите насилни настани.

Оваа изјава е дел од постојаната реторика на Москва која ја користи во контекст на војната во Украина и геополитичките тензии меѓу САД и Русија.