Поранешниот министер за надворешни работи на Италија, Луиџи Ди Мајо, се огласи преку видео-порака и му даде јавна поддршка на кандидатот на ДУИ за градоначалник на Чаир, Бујар Османи.

Во своето обраќање, Ди Мајо не зборуваше само како поранешен висок дипломат, туку и како човек кој долги години соработувал со Османи на највисоко ниво. Тој потсети на заедничкиот период кога двајцата биле министри за надворешни работи и подвлече дека Османи бил и останал гласен поборник за европската иднина на Северна Македонија.

„Бујар е почитуван пријател на Европа и на Европската унија. Неговите напори за унапредување на односите меѓу Скопје и Брисел беа искрени, посветени и секогаш насочени кон целта – полноправно членство на земјата во Унијата“, рече Ди Мајо.

Италијанскиот политичар дополнително се задржа на односите меѓу Италија и Северна Македонија, кои, како што нагласи, биле унапредени токму преку заложбите на Османи. „Ти си голем пријател на Италија. Работевме многу заедно за да ги доближиме нашите земји и нашите народи. Никогаш нема да ги заборавам твоите зборови за дијаспората и за значењето на граѓаните во градењето мостови помеѓу нашите држави“, порача Ди Мајо.

На крајот, тој ја заокружи пораката со лична препорака и отворена поддршка: „Ти си мој пријател затоа што си доверлив политичар. Сигурен сум дека чесните и способни луѓе, кои навистина се грижат за своите сограѓани, секогаш ќе бидат поддржани. Среќно во новиот предизвик и среќно на твојата земја“.

Со оваа видео-порака, Луиџи Ди Мајо директно се вклучи во предизборниот амбиент во Чаир, ставајќи до знаење дека кандидатурата на Османи ја гледа како можност не само за општината, туку и за целата држава.